شعار قناة الأهلى "كله غلط وإحنا اللى صح"

ayman الخميس أغسطس 05, 2010 12:39 am

ماحدش يقدر ينسى تاريخ النادى الأهلى سواء فى مصر أو بره وماحدش يقدر ينكر أن القلعة الحمراء هية بطل فيلم الكرة المصرية والباقى كله سنيدة، عشان يتقال إن فى كورة فى مصر لكن الحقيقة أن الكورة هى الأهلى.

كل ما أشغل التلفزيون واتفرج على قناة الأهلى خصوصاً البرامج أحس أن النادى العظيم ده بينزل من نظرى كل يوم زيادة عن اللى قبله وأقول لنفسى هما بيعملوا كده ليه، هو الأهلى محتاج إن ناس يطلعوا ليل نهار يهاجموا ده ويشتموا ده والغريبة أن الأهلى عمره ما بغلط أبداً ودايماً اللى قدامه هى اللى غلطان.

عمرى ما هنسى استوديو تحليل الحكام فى مباراة الأهلى وإنبى السنة اللى فاتت لما الأستاذ الكبير خالد توحيد عمل كل حاجة عشان يطلع أن الحكم ما ظلمش إنبى مع إن كل المصريين اللى بيفهموا فى الكورة واللى ما بيفهموش صعب عليهم إنبى حتى الحكم الدولى السابق وجيه أحمد اللى كان بيحلل أداء سمير عثمان اللى حكم الماتش قال إنبى اتظلم ماعدا خالد توحيد اللى شاف إن الأهلى خد كل حقوقه الشرعية والحكم ما عملش أى حاجة ومش كده وبس ده كمان طلع الأهلى مظلوم طب إزاى.

دلوقتى فى ثنائى فى القناة شغالين شتيمة وتهزيق فى كل الناس الأول محمد الليثى وده شغال الله ينور وأى حد يقول كلمة ضد النادى الأهلى ياويله وياسواد ليلة من الليثى اللى ما بيرحمش وهيسود عيشته وعيشة اللى جابوه، أما التانى هو الأستاذ الصحفى إبراهيم المنيسى الصحفى بجريدة الأخبار والمفروض أنه يكون قمة الحياد لكن إزاى يصنف نفسه بالشكل ده ويبقى أهلاوى قدام كل خلق الله بقى ينفع كده تبقى صحفى فى جريدة قومية وتمسك مجلة نادى وتشتغلش فى القناة بتاعته وتدافع عنه طب إزاى الناس هتصدق كلامك فى الجرنال اللى بتكتب فيه أحسنلك تسيبك من الصحافة وتخليك شغال فى البطيخة.